𝗜𝗟𝗢𝗜𝗟𝗢 𝗖𝗜𝗧𝗬 —Opisyal na nga ginpakilala ni Iloilo City Mayor Jerry Treñas ang iya anak nga si Raisa Treñas-Chu kay House Speaker Martin Romualdez kasunod sang ginpatigayon nga pagsumpa sang bag-o nga mga myembro sang National Unity Party (NUP).
Ang kahiwatan ang kadungan man sa pagpakig-alyansa sang National Unity Party kag sang Partido Federal ng Pilipinas (PFP) nga partido ni President Ferdinand “Bongbong” Marcos, Jr.
Sa interview sang Bombo Radyo kay Treñas, iya ginpahayag nga pagkatapos sang oath taking, nagpadulong ini kay Romualdez kaupod ang iya anak nga si Raisa agud nga mapakilala ini, sa diin, nagkamustahanay kag nag-istoryahanay pa sila.
Suno kay Treñas, opisyal niya man nga ginhambal kay Romualdez nga mapadalagan ang iya anak bilang congresswoman sa Iloilo City.
Ginpahayag man sang alkalde nga posible pamilyar naman si Romualdez sa nagakatabo sa syudad sa patag sang politika.
Ginklaro niya man nga lunsay pagsumpa kag pagpakilala lamang ang natabo kag wala sang eleksyon sa mga bag-o nga myembro sang National Unity Party.
Ginalantaw man sang natungdan nga magapadalagan ang iya nga anak bilang administration candidate, amo man kay Iloilo City Lone District Representative Julienne “Jam-jam” Baronda.
Nangin kabahin man sang kahiwatan nga naghalin sa Western Visayas amo sanday Governor Joaquin Carlos Rahman Nava kag Guimaras Lone District Representative Ma. Lucille Nava sang probinsya sang Guimaras.
