ILOILO CITY – Luyag ni Iloilo City Mayor Jerry Treñas nga i-extend ang enhanced community quarantine sa syudad sang Iloilo.
Sa interview sang Bombo Radyo kay Mayor Treñas, iya ginpahayag nga kun siya lang ang pamangkuton apisar wala sang science based recommendation, luyag niya i-extend pa ang enhanced community quarantine samtang nagahulat sang mass testing.
Suno kay Treñas, kun ipatigayon kuntani ang mass testing, mas mahibaluan ang mga positibo kag negatibo sa Coronavirus Disease 2019.
Sa tion nga pahanugutan sang Department of Health 6 ang mass testing sa Western Visayas, unahon ni Mayor Treñas nga i-test ang mga Persons Under Investigation, Persons Under Monitoring, mga personnel sa Iloilo Diamond Jubillee Hall, mga frontliners kaangay sang nurse kag doktor kag mga naka close contact sang mga magapositibo sa COVID-19 kun may yara.
Ang pagpangita sang Iloilo City Government sang mga isolation centers ang preparasyon sa tion nga magsaka ang kaso sang COVID-19 sa syudad.
Sa subong, ginahulat pa sang alkalde ang rekomendasyon sang mga doktor kag Department of Health kun bala i-extend ukon indi ang enhanced community quarantine sa syudad sang Iloilo.
