Nagalaom ang Iloilo City Government nga mapunubuan sang Inter-Agency Task Force for the Management of Emerging Infectious Diseases (IATF) ang alert level status sang Iloilo City kasunod sang padayon nga pagnubo sang positivity rate sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga base sa report, nagapadayon ang pagnubo sang kaso sang COVID-19 sa Iloilo City kag may mga adlaw nga halos wala gid sang bisan isa ka kaso sang virus nga marekord.
Suno sa alkalde, bangud sini, gindula na sa syudad ang ginapatuman nga curfew, gin-lift ang ban sa makahulubog nga ilimnon kag ginpasugtan na ang pagbukas sang pila ka mga establisyemento komersyal.
Pahayag ni Treñas, wala man untat ang iya pag-follow up sa IATF angot sa iya apelar nga panubuan ang alert level status sa syudad agud nga mabuksan man ang iban nga mga negosyo nga madugay ginsirado bangud sa pandemya.
