ILOILO CITY – Ginatun-an sang Iloilo City Government ang posibilidad nga magpagwa sang executive order kun sa diin i-mandu nga ang mga tawo lang nga nakapabakuna batok sa COVID-19 ang pahanugutan nga magbalik sa trabaho sa mga negosyo sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga gin-forward na ang iya proposed executive order sa City Legal Office para sa dugang nga pagtuon.
“We want to make sure nga ang mga nagaulubra sa syudad naka-immunize na. That proposed executive order is now in the city legal office para tun-an na,” pahayag ni Treñas.
Suno sa alkalde, mangin wala man sa gihapon sang pulos ang pag-procure sang bakuna kun indi ini paghimuon nga requirement.
“Manigurado gid kita. May iban pa gid kita nga ginaplano. It would be useless if we do not make it a requirement,” dugang pa sang alkalde.
Matandaan nga as of February 16, base sa turnout sang COVID-19 vaccine consent forms nga ginpanagtag sa 9,731 ka mga pumuluyo sa syudad, 29% lang ang nag-HUO sa pagpabakuna.
Madamo ang nagpangindi bangud sa kahangawa sa epekto sang bakuna kag ginapahayag kakulang sa impormasyon sa vaccination.
Sa pamangkot kun himuon gid ini nga mandatory sa mga ordinaryo nga tawo nga nagatrabaho sa lain-lain nga negosyo sa syudad, sabat sang alkalde: “Mabudlayan ka mangita sang trabaho, pero teh libre man ni gani ang bakuna amo na nga ginatun-an sang city legal naton. Wala man gastuhan bisan sin-o nga tarpulano ang mapa-injection kay ang syudad man ang mangita sang pondo.”
