Suportado ni Iloilo City Mayor Jerry Treñas ang tikang sang City Legal Office nga renegotiation sa Double Dragon Properties Corp kaangot sa Guimaras Iloilo Ferry Terminal (GIFT) Project.
Sa interview sang Bombo Radyo kay Joy Fantilaga, spokesperson ni Mayor Treñas, iya ginpahayag nga suportado niya ang negosasyon ilabi na kon nagatumod ini sa mas masanyog nga financial terms para sa syudad.
Suno kay Fantilaga, kon makit-an nga ang renegotiation ang favorable sa Iloilo City, mahimo nga ipa-recieve ini sa Double Dragon Properties Corp.
Nahibaluan nga halos duha ka tuig matapos gin-umpisahan ang pagrepaso liwat sang Joint Venture Agreement (JVA) para sa Guimaras-Iloilo Ferry Terminal Services (GIFTS) sa Parola Wharf.
Ginpirmahan sang 2012 sa panahon sang administrasyon sadto ni Mayor Jed Patrick Mabilog, ginhatagan ang Double Dragon Properties Corp sang 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Ang Joint Venture ang nagahatag sa Double Dragon sang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
