Gin-anunsyo ni Iloilo City Mayor Jerry Treñas sa publiko ang iya nga suporta para kay Vice President Leni Robredo nga nagapadalagan sa pagka-presidente sa 2022 elections.
Sa interview sang Bombo Radyo kay Mayor Treñas, iya ginpahayag nga ginpili niya nga suportahan sa eleksyon ang bise-presidente bangud suod niya nga abyan ang bana sini nga si former Department of Interior and Local Government (DILG) Secretary Jesse Robredo.
Suno sa alkalde, nakilala man niya sang maayo si VP Leni bangud madugay ang ila updanay sa Kamara.
Pahayag ni Treñas, madamo man sang binuligan si Robredo sa syudad sang Iloilo.
Labaw sa tanan suno kay Treñas, nakitaan niya sang competence, maturity, leadership kag ikasarang sa pagdumala sang gobyerno ang bise-presidente kag bisan wala pa nakadesisyon ang iya partido kun sin-o ang suportahan sa presidency, yara na ang tagipusuon sang alkalde kay Robredo.
Nahibaluan nga si Vice President Robredo ang presidential nominee sang opposition coalition nga 1SAMBAYAN.
Nag-file siya sang certificate of candidacy bilang independent candidate sa eleksyon sa diin si Senator Francis “Kiko” Pangilinan ang iya napilian bilang vice president.
Ang iya nga senate slate ang ginalakipan sang pila ka mga kandidato halin sa nagkalain-lain nga political parties.
