ILOILO CITY – Tinguhaan ni Iloilo City Mayor Jerry Trenas nga mahatagan sang cash assistance ang mga pumuluyo sa syudad nga wala nadala sa Social Amelioration Program.
Sa interview sang Bombo Rado kay Mayor Trenas, iya ginpahayag nga natapos na nga mahatagan sang social amelioration fund ang mga benepisyaryo sang Punong, Lapuz kag Magsaysay, Iloilo City Proper.
Suno kay Trenas, amat-amat na nga mahatagan ang tanan nga barangay sa syudad antes matapos ang Abril 30.
Sa masunod nga bulan, may yara naman sang bag-o nga pondo nga ihatag ang national government nga para sa bulan sang Mayo.
Pahayag niya, ang mga wala nadala sa social amelioration program ang tinguhaan sang Department of Social Welfare and Development nga mapasulod kag ang indi pa gid mapasulod sa nasambit nga programa, mismo ang Iloilo City Government na ang mahatag sang cash assistance para sa mga wala nakabaton sang social amelioration program.
Dugang pa sang alkalde, apisar nga indi mangin kaangay ang kantidad nga mahatag sang Iloilo City Government ipaanggid sa iya sang DSWD, importante nga makabulig ini sa mga pumuluyo.
