Nagapati si Iloilo City Mayor Jerry Treñas nga kinahanglan na sang presidential intervention ang problema sang syudad angot sa tuman ka dako nga utang sang Philippine Health Insurance Corporation (PHILHEALTH).
Sa interview sang Bombo Radyo kay Mayor Treñas, iya ginpahayag nga kadungan sang pagtawag kahapon ni Chief Presidential Legal Counsel Atty. Salvador Panelo sa pamunuan sang PHILHEALTH angot sa concern sang syudad, ginpahayag sang ahensya nga nabayaran na nila ang tanan nga utang.
Apang wala ini sang kamatuoran suno kay Treñas bangud sa P200 Million nga utang sang ahensya sa Molecular Laboratory sang syudad, P1 Million pa lang ang nabayaran.
Nagdangat man suno sa alkalde sa P1.1 Billion ang utang sang PHILHEALTH sa mga ospital sa syudad.
Pahayag ni Treñas, posible nga naputo na ang ahensya bangud sa ‘problematic’ nga cash flow.
Samtang, magluwas sa problema sang syudad angot sa utang sang PHILHEALTH, napalab-ot man ni Treñas kay Secretary Panelo ang pila ka mga wala pa natapos nga plano kag proyekto kaangay sang Panay- Guimaras bridge, kag pagpalapad sang Iloilo International Airport.
Naghingyo man ang alkalde nga hatagan ang syudad sang 50,000 tubtob 65,000 doses sang COVID-19 vaccines kada semana kasunod sang nagataas nga kaso sang virus.
