Nagapati si Iloilo City Mayor Jerry Treñas nga maintrahan gid sang Public Private Partnership (PPP) Committee ang kontrata sang Joint Venture Agreement (JVA) sa Double Dragon Properties Corp kaangot sa Guimaras Iloilo Ferry Terminal (GIFT) Project.
Sa interview sang Bombo Radyo kay Mayor Jerry Treñas, iya ginpahayag nga nagakabalaka siya bangud ang joint venture ang yara sa Republic Act 11966 ukon ang Public Private Partnership Code of the Philippines nga nagadumala sang mga proyekto sang gobyerno.
Suno kay Treñas, masawsaw gid ang Public Private Partnership Committee sang Iloilo City Council kaangot sa renegotiation sang Guimaras Iloilo Ferry Terminal Project.
Nagpasalig man ang natungdan nga tun-an sang maayo negosasyon agud mas mahatagan sang interes ang bahin sang city government.
Nahibaluan nga halos duha ka tuig matapos gin-umpisahan ang pagrepaso liwat sang Joint Venture Agreement (JVA) para sa Guimaras-Iloilo Ferry Terminal Services (GIFTS) sa Parola Wharf.
Ginpirmahan sang 2012 sa panahon sang administrasyon sadto ni Mayor Jed Patrick Mabilog, ginhatagan ang Double Dragon Properties Corp sang 25 ka tuig nga kinamatarong sa pagdevelop kag pag-operate sang 13,000-square-meter terminal complex.
Ang Joint Venture ang nagahatag sa Double Dragon sang 25 year exclusive rights sa pagkolekta sang terminal, berthing and cargo fees, kag ang pagparenta sang mga commercial spaces sa terminal complex.
Sa idalom sang JVA, ang bahin sang syudad naglakip sang 1-5% sang kita sa gross terminal fee, 1% sang gross berthing fee revenues, 1% sang gross cargo fee revenues, kag 1% sang gross rental revenue (wala labot ang VAT).
