Wala pa nakabaton ang syudad sang Iloilo sang impormasyon angot sa narekord sang Department of Health (DOH) nga 10 ka close contact sang duha ka kaso sang delta COVID-19 variant nga na-detect sa Pandan, Antique.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala pa nakapalab-ot ang DOH sa iya may kaangtanan sa backtracking nga ginpatigayon sa duha ka kaso sang mas makalalaton nga variant sang COVID-19.
Apang suno kay Treñas, basta may kumpirmado nga kaso sang virus, pat-od nga may yara ini sang close contact.
Ini man ang rason pahayag sang alkalde nga ipatuman sang syudad ang pagrequire sang negative reverse transcription polymerase chain reaction (RT-PCR) test 72 hours antes ang byahe sang tanan nga travelers nagikan sa iban nga lugar sa rehiyon.
Dugang pa sang alkalde, madamo sang referral hospitals sa Iloilo City sa diin kadam-an sa mga pasyente ang nagikan sa nanuhay-tuhay nga probinsya rason nga nagakadapat mas istriktuhan ang protocol sa syudad.
