𝗜𝗟𝗢𝗜𝗟𝗢 𝗖𝗜𝗧𝗬 — Wala na sang plano si Iloilo City Mayor Jerry Treñas nga liwat ipatawag ang Department of Public Works and Highways (DPWH) Region 6 kag Iloilo City District Engineering Office kaangot sa wala napasa nga mga permit sang ila proyekto.
Sa interview sang Bombo Radyo kay Treñas, iya ginpahayag nga madamo pa siya sang importante nga mga bagay nga himuon kag dapat nga tutokan kon ikumpara sa liwat-liwat nga pagpahanumdom sa Department of Public Works and Highways sang ila nga kakulangan.
Suno kay Treñas, maayo na ini nga mabal-an sang ahensya nga kinahanglan nila nga mag-comply sang tanan nga mga requirements agud nga mapadayon ang mga ginpauntat nga proyekto.
Nagapati man ang alkalde nga isa na ini ka pahanumdom sa bahin sang Office of the Building Official (OBO) para sa Iloilo City District Engineering Office agud nga magsunod sa tanan nga rekisitos nga kinahanglanon sa ila nga proyekto.
Nahibaluan nga lakip sa mga gin-revoke sang Iloilo City Council nga proyekto sang DPWH Region VI amo ang:
Mandurriao Market
Dulonan, Arevalo Multi-Purpose Building
Dungon C, Mandurriao Multi-Purpose Building
Tanza Esperanza Multi-Purpose Building
Santa Filomena, Arevalo Multi-Purpose Building
Balantang, Jaro Multi-Purpose Building
Katilingban, Molo Multi-Purpose Building
