ILOILO CITY- Wala nagakabalaka si Iloilo City Mayor Jerry Treñas sa posibilidad nga may negatibo nga epekto sa iya para sa nagahilapit nga eleksyon ang iya pagpanindugan batok sa pagpatindog sang Philippine Offshore Gaming Operators hub sa syudad kag ang iya kampanya batok sa mga Chinese nationals nga illegal nga nagaistar diri.
Sa interview sang Bombo Radyo kay Trenas, iya ginpahayag nga kun ang suporta sang Chinese nga mga negosyante ang istoryahan ilabi na sa paghatag sang pondo sa tion sang kampanya, indi man dako gid nga contributor ang Chinese Community.
Suno sa alkalde, base ini sa iya apat ka dekada na nga karera bilang pulitiko.
May kaangtanan naman sa scenario nga may iduso ang Chinese community nga politiko agud ipakontra sa iya, wala man ini ginakabalak-an sang alkalde bangud nga para sa iya, ang pumuluyo sa gihapon ang magadesisyon.
