ILOILO CITY- Ginpadala na sang Iloilo City Government sa National Inter Agency Task Force(NIATF) for the Management of Emerging Infectious Diseases ang appeal letter nga nagahingyo nga ipaidalom ang status sang syudad sa Alert level 2 gikan sa Alert level 3.
Ini kasunod sang anunsiyo sang NIATF nga palawigon pa ang Alert Level 3 status sa syudad tubtob sa Pebrero 28.
Sa interview sang Bombo Radyo kay Iloilo City Mayor Jerry Treñas, iya ginpahayag nga nasaad sa appeal letter ang basehan kun ngaa dapat panubuon ang alert level sa syudad kaangay sang pagnubo man sang average daily attack rate (ADAR) kag Health Care Utilization rate (HCUR) sa syudad.
Suno sa alkalde, ini agud nga mabuligan ang sektor sang negosyo nga makarekober na ilabi na ang mga industriya nga ginpauntat sa pag-operate.
Wala naman nagapati ang alkalde nga ginapulitika sang gobyerno ang pag-extend sang Alert Status sang syudad bangud nga si Vice President Leni Robredo ang ginasuportahan sini sa pagka-presidente.
