Wala sang mando halin kay Iloilo City Mayor Raisa Treñas nga islan sang color blue ang payong nga pula nga ginhatag sang isa ka money remittance center sa mga sidewalk vendors.
Ini ang ginklaro ni Joy Fantilaga Gorzal nga spokesperson ni Mayor Treñas.
Kasunod ini sang nabatun nga impormasyon ni Iloilo City Lone District Representative Julienne “Jam-Jam” Baronda nga ginpakigbahin man sini sa iya social media account may kaangtanan sa nasambit nga isyu.
Suno kay Gorzal, wala gid sang direktiba ang alkalde nga ipakakas ang nasambit nga mga payong ilabi na nga nakatutok man ini sa iya ginkadtuan nga official engagement sa International Disaster Resilience Leaders Forum sa South Korea.
Ginklaro man niya nga wala ginadumilian sang City Government ang mga sidewalk vendors, kun indi ang mga naga-obstruct sang mga ini nga pwesto ukon gamit kaangay sang shade, tent, tarpaulin, canopy ukon payong nga naga-extend sa sidewalk.
Pahayag ni Gorzal, responsibilidad sang Anti-Squatting and Illegal Structures Task Force ang magpatigayon sang clearing operations agud masiguro nga wala ang mga street vendors nag nagabalabag sa kalsadahun.
