OTON, ILOILO – Temporaryo nga siraduhon ang Municipal Disaster Risk Reduction Management Office sang Oton, Iloilo.
Sa interview sang Bombo Radyo kay Jafet Salinas, COVID-19 focal person sang Local Government Unit sang Oton, iya ginpahayag nga ang temporary closure ang maga-umpisa sa Oktubre 19 kag magalawig tubtub sa Oktubre 25.
Katuyu-an sini suno kay Salinas amo nga mahatagan sang ligwa ang disinfection matapos nga anum ka MDRRMO personnel ang nagpositibo sa COVID-19.
Ang nasambit nga lihok suno kay Salinas ang nadesisyunan ni Mayor Carina Flores bilang precautionary measure agud nga indi na madugangan ang numero sang MDRRMO personnel nga malatnan sang virus.
Ang mga personnel sang nasambit nga opisina ang may daku nga exposure sa virus bangud sila ang nagapatigayon sang emergency response.
Bangud sini, ang Rural Health Unit anay ang magasalo sang trabaho sang Municipal Disaster Risk Reduction Management Office kag mahimo sila nga malab-ot sa telephone number nga 3383761.
Ang anum ka COVID-19 positive ang nagapabilin nga asymptomatic kag nagapaidalom na sa isolation samtang nagapadayon ang contact tracing.
