Interesado ang tatlo ka mga kumpaniya sa United Kingdom nga makig-partner sa lokal nga mga kumpaniya diri sa Pilipinas agud nga mag-suplay sang meat products.
Ginpahayag ini ni Jonathan Eckley, director sang international trade development sa Agriculture and Horticulture Development Board, kadungan sang Philippine-British Meat Trade Mission year-end reception.
Suno kay Eckley, diri na sa Pilipinas ang tatlo ka meat exporters agud malab-ot ang existing kag bag-o nga mga kliyente kag agud matun-an ang market opportunities sa pungsod.
Pahayag sini, indi nila mabalewala ang Pilipinas bangud amo ini ang pinakadaku nila nga market sa guwa sang Europa.
Plano man nila nga padayunon ang trade missions sa Pilipinas agud nga mabuligan ang meat exporters sang United Kingdom.
Base sa data sang Bureau of Animal Industry, naka-export ang United Kingdom sang 580 metric tons sang karne sa Pilipinas; 1,032 metric tons sang manok; kag 15,372 metric tons sang karne sang baboy as of September.
