ILOILO CITY – Gin-ako sang local organizers sang Palarong Pambansa 2017 nga ceremonial medals lang ang mga medalya nga una na ginpanghatag sa pila ka mga atleta nga nagdaog sa nasambit nga sporting event.
Sa interview sang Bombo Radyo, ginpahayag ni Nicolasito Calawag, chairman sang Bids and Awards Committee (BAC), indi na pagbawion ang napanagtag nga mga medalya.
Donasyon lang suno kay Calawag ang nasambit nga mga medals kag gingamit nga ceremonial medals agud indi mahuy-an ang probinsiya sang Antique bilang host sang Palarong Pambansa.
Nahibaluan nga kahapon lang gin-award sang Bids and Awards Committee and kontrata para sa supplier sang mga medalya.
Una diri, ginreklamo sang supplier nga 168 School and Office Supplies ang ginapahayag sang pagkuha sang Antique provincial government sang mga medalya sa supplier nga wala nakapasakop sa bidding.
Ang 168 ang ginhatagan sang BAC sang kontrata para mag-supply sang kapin 3,000 ka mga medalya para sa Palarong Pambansa.
Apisar nakuha ang kontrata, ginpahayag ni Atty. Eduardo Fortaleza, legal counsel sang 168 School and Office Supplies nga magapasaka gihapon sila sang kaso batok sa Antique provincial government.