Nagpanawagan si Board Member Rolex Suplico sang 5th District nga indi paggamiton sa pulitika ang implementasyon sang Medical Assistance to Indigent and Financially Incapacitated Patients (MAIFIP), nga ginapundohan sang national government kag gin-aprubahan sang Sangguniang Panlalawigan sa ila 4th regular session.
Sa interview sang Bombo Radyo, ginpahayag ni Suplico nga ang MAIFIP may pondo nga nagalab-ot sa ₱39.5 milyon nga igaturn-over sa mga district hospitals. Ini ang gamiton para ireimburse ang gasto sang Iloilo Provincial Government sa pagbulig sa mga pasyente nga indigent.
Ginklaro niya nga ang nasambit nga programa yara pa sa proseso sang pagpirma sang memorandum of agreement ukon MOA sa tunga sang Iloilo Provincial Government kag Department of Health–Western Visayas Center for Health Development (DOH-WV CHD).
Apang suno kay Suplico, kulang pa ang detalyado nga guidelines sa programa, partikular na sa pagdeterminar kun sin-o gid ang kwalipikado nga matawag nga indigent. Nabatyagan sini nga kinahanglan may klaro nga sistema, bangud sa mga nabatian niya sang nagligad nga eleksyon, kun sa diin ang aprubado lang kuno sang kapitan ukon congressman ang ginatugutan nga mabuligan.
Gintumbok man niya nga ginpamangkot niya mismo kun pwede bala siya mangin indigent kag ginsabat nga “pwede,” rason nga nangin duda siya sa objectivity sang sistema. Ginpahayag pa niya nga dapat ang social worker sang ospital ang magahimo sang assessment, kag may proseso man para sa appeal kun indi ma-aprubahan ang isa ka pasyente.
Ginpanawagan ni Suplico nga sundon ang husto kag patas nga assessment agud masiguro nga ang bulig-medikal maglab-ot gid sa mga matuod nga nagakinahanglan kag indi malambutan sang pulitikal nga impluwensya.
Reported By: Phauline Pillora/Zona Libre
