LEON, ILOILO – Nagalaum ang isa ka volunteer medical frontliner nga matapos gilayon ang pandemya sa bug-os nga kalibutan.
Sa Good Morning Philippines program, ginpahayag sang medical technologist nga si Jino Conrad Calambuhay sang Leon, Iloilo, nga bilang volunteer medical frontliner sang Rural Health Unit sang ila banwa, madamo ang iya nabinag-binag kadungan sang na-eksperyensyahan nga new normal.
Suno kay Calambuhay, madamo ang ginasakripisyo niya bilang medical frontliner agud lamang nga makabulig sa mga COVID-19 patients lakip na sa pagsugat sa mga nagapauli nga Overseas Filipino Workers.
Sa subong suno kay Calambuhay, may yara na sang pito ka repatriated OFWs sa Leon nga ginapaidalom sa active monitoring kun sa diin ang Leon Central Elementary School ang nagaserbe nga facility quarantine sang banwa.
Ginpahayag ni Calambuhay nga magluwas sa iya kaugalingon, ginakahangaw-an man niya ang mga kaupod sa balay nga posible malatnan sang virus bangud sa iya exposure bilang medical frontliner.
Agud nga mahagan-hagan ang posibilidad sang local transmission, ginpahayag ni Calambuhay nga kinahanglan niya nga magpaligo sa tion nga magpauli kag kun kaisa, maka duha na lang ka bes sa isa ka semana siya nagapauli sa ila balay.
Magluwas sa exposure sa virus, ginpahayag sang natungdan nga tuman ka init sa pamatyagan ang pagsuksok sang Personal Protective Equipment apang kinahanglan niya ini agwantahon.
Sa pihak sang kabudlay, ginpahayag ni Calambuhay nga indi dapat magkahuya kag magdula sang paglaum ang tanan nga medical frontliners bangud nga ang tanan ang may yara gid sang katapusan.
