𝗖𝗘𝗕𝗨 𝗖𝗜𝗧𝗬 — Ginpasigurado sang medical team sang Palarong Pambansa 2024 nga matatapan ang tanan nga mga atleta nga posible ma-injure sa mga hinampang.
Sa interview sang Bombo Radyo kay Dr. Rhoel Dejaño, head sang Palarong Pambansa, iya ginpahayag nga ipatuman sang ila nga medical team ang holistic approach sa mga atleta nga injured
Suno kay Dejaño, may yara sila sang infirmary nga kompleto ang mga equipment, medical management, ultrasound area, kag rehab section agud gilayon nga mahatagan sang nagaigo nga pagbulong ang mga atleta nga ma-suprer sang injuries.
Ginpahayag man sini nga antes paman nag-umpisa ang mga hinampang, nagsugod naman sila sang operasyon, kon sa diin, yara na sa 35 ka mga atleta ang ila nalapatan sang pagbulong.
Gin-athag man sang natungdan nga ang tanan nga atleta ang gilayon man nga na-discharge.
Masami man sa mga ginabatyag sang mga atleta amo ang muscle sprain, shoulder pain, muscle pain, kag exhaustion nga isa lamang ka normal nga hitabo sa amo nga kahiwatan.
Ginpasigurado man sang medical team nga preparado ang mga orthopedic surgeon sang team agud nga magbulig kon hinali man nga may mga atleta nga mabalian.
Nahibaluan nga may kapin 700 ka mga medical volunteers ang team nga naka-standby sa pila ka parte sang playing venues agud mag-assist sa mga atleta.
