Nanindugan ang Medicus Medical Center nga gindala gilayon sa Emergency Room ang delivery rider nga naaksidente sa motorsiklo sa tubang mismo sang nasambit nga ospital, kaagahon sang Agosto 27.
Ini ang base sa incident report nga ginsaysay ni Rhea Garcia, Administrator sang Medicus Medical Center.
Suno sa iya, pasado alas-3:45 sang kaagahon sang nabatian sang security guard nga naka-duty sa Medicus ang mabaskog nga lagapok sa kalsada.
Pahayag sang gwardya, nakita sini ang naaksidente nga indibidwal kag nagtawag sya sa Iloilo City Police Station 10 kag gin-report man sa Iloilo City Emergency Response (ICER) team kag sa Emergency Room complex sang ospital ang natabo.
Alas-3:55 sang kaagahon, nakabaton sang tawag ang ER complex halin sa security guard nahanungod sa motorcycle accident kag ang referral sang ICER kag kapulisan.
Gilayon nga ginpahibalo sang ER staff nurse nga naka-duty ang surgical physician nahanungod sa ginalauman nga admission sang pasyente.
Samtang, gin-alerto ang ER team agud makahatag sang nagakaigo nga pag-atipan sa pasyente sa iya pag-abot sa emergency room.
Alas-4:08 sang kaagahon, nag-abot sa lugar sang insidente ang ICPS-10.
Makaligad ang halos isa ka minuto, nag-abot man ang ICER team nga nag-assess sa pasyente kag nagdala sa iya sa emergency room sang ospital.
Ginkilala ang pasyente nga si Orlando Homena.
Pag-abot sa ER, gilayon nga ginbutang si Homena sa stretcher, gintakdan sang oxygen kag cardiac monitor para sa iya kag gin-atipan.
Sang 4:40 sang kaagahon, nag-abot ang pamilya ni Homena kun sa diin indi halos ini makadesisyon kung i-admit ang ila himata sa Medicus Medical Center.
6:30 am, didto na kag nagdesisyon ang pamilya Homena nga i-transfer na lang si Orlando sa Western Visayas Medical Center gamit ang salakyan sang Medicus.
Pahayag ni Garcia, alas-10:20 na sang aga na-receive sang WVMC si Homena.
Nagdepensa siya nga gindapatan sang nagakaigo nga pagbulong si Homena.
Nahibaluan nga ang nasambit nga incident report kag clarification ang ginpangayo ni Councilor Alan Zaldivar sa ospital sang September 15.
TEXT BY: Bombo Cyrene Nasis
