“Medyo alarming dun aton situation” – Passi City Mayor Stephen Palmares sa kaso sang COVID-19 sa syudad

PAASI CITY – Nag-isyu sang Executive Order si Passi City Mayor Stephen Palmares sa pagdumili sa mga mass gathering sa syudad.

Sa interview sang Bombo Radyo kay Mayor Palmares, iya ginpahayag nga makaalarma ang sitwasyon subong sang Passi bangud humalin sang nakaligad nga semana, ang COVID-19 cases nga na rekord ang nagalab-ot sa 60.

Kahapon, nakarekord na naman sang 18 ka mga local COVID-19 cases ang nasambit nga component city.

Samtang pahanugutan sa gihapon ang lubong sa mga minatay apang ang misa ang dapat nga sa balay na lang temporaryo.

Apang suno kay Mayor Palmares, wala man sang may naka schedule nga lubong sa Passi tubtob sa Nobyembre 4.

Nagalab-ot naman sa 150 tubtob 200 ka mga residente sang Passi ang ginapaidalom sa RT-PCR tests adlaw-adlaw.

Pahayag sang alkalde, ginalauman na niya nga magasaka ang kaso sang COVID-19 bangud sa ginahimo nga mass testing.

Katuyuan sini nga matukiban ang mga asymptomatic COVID-19 positive agud nga ma isolate kag indi na makalaton pa sa iban.

Nagapangabay si Mayor Palmares sa mga Passinhon nga sundon lang ang mga polisa sang banwa.