Ginbombahan sang Israel kag Estados Unidos sang Amerika ang building sa syudad sang Qom kun sa diin nagatipon ang mga opisyal sang Iran agud kuntani magpili sang ila bag-o nga Supreme Leader.
Ginkumpirma ini sang Tasnim news agency nga affiliated sa Islamic Revolutionary Guard Corps.
Magluwas sa amo nga atake suno sa ahensya, nagpangbomba man ang US kag Israel sa compound sa Tehran nga nahamtang sa former parliament building kun sa diin may yara man sang assembly.
Nagaguwa sa reports nga ang target sang atake amo ang formal session sang Assembly of Experts.
Sa idalom sang Konstitusyon sang Iran, ang Assembly of Experts amo ang clerical body nga may katungdanan sa pag-appoint sa supreme leader.
May 88 ka mga miyembro ang council, apang indi pa subong klaro kun pila ang yara sa building sang tion nga nagbomba ang US kag Israel. Indi pa maathag subong kun ano kadaku nga damage ang nabilin.
Matandaan nga napatay si Supreme Leader Ali Khamenei kag halos 50 ka senior Iranian officials sa pagpang-atake sang US kag Israel sang weekend.
