Nagapabilin sa Pilipinas ang World Boxing Council (WBC) minimumweight belt matapos ang madinalag-on nga title defense sang Filipino world champion nga si Melvin Jerusalem batok sa Mexican challenger nga si Luis Castillo.
Ginlutos ni Jerusalem ang kasumpong via unanimous decision sa dose ka rounds nga world title clash kagab-i, Septyembre 22, sa Manny Pacquiao Presents: Blow by Blow sa Mandaluyong City College Gym.
Sa imbukada pa lamang nga round, gintumba na sang 30-anyos nga Pinoy boxer si Castillo apang nakalampuwas ini tubtub sa katapusan nga round kag nagsalig na lang kuntani nga ma-knockout ang Pinoy para maagaw sini ang 105-pound world title.
Sa second round, napatupa sang Pinoy ang apat ka sunod-sunod nga rights apang naluwas sang bagting ang Mexican.
Napabilin ni Jerusalem ang pacing, madasig nga jab kag ang trademark sini nga right straight sa lawas kag ulo sang kasumpong nga amo man ang nakit-an sang tatlo ka judges kag nagpabor sa iya, 120-107, 120-107, kag 118-109.
Nagsaka na sa 23-3 ang professional boxing record ni Jerusalem nga may 12 knockouts samtang ini naman ang una nga mapait nga kalutusan ni Castillo sa iya professional career kag subong may opisyal na nga record nga 21-1-1 nga may 13 knockouts.
Ginpahayag naman ni Sanman Promotions head JC Manangquil nga tinguhaan nila nga maka-arrange sang unification bout para kay Jerusalem sa masunod nga tuig.#
