ILOILO CITY – Opisyal na nga ginpirmahan ang Memorandum of Agreement sa tunga sang Iloilo City Government kag Iloilo Provincial Government may kaangtanan sa pagtanom sang mga native trees halin sa syudad padulong sa gateway sang Iloilo International Airport.
Ginpangunahan ni Iloilo City Mayor Jerry Treñas kag Governor Arthur Defensor Jr. ang pirmahanay sang nasambit nga memorandum.
Kaupod man sa nasambit nga kahiwatan ang mga alkalde sang Pavia, Iloilo nga si Mayor Laurence Anthony “Luigi” Gorriceta; Mayor Dennis Superficial sang Sta. Barbara, Iloilo; Mayor Elizalde Pueyo sang Cabatuan, Iloilo; Civil Aviation Authority of the Philippines Acting Area Manager Area VI Mr. Eusebio Monserate Jr.; kag Department of Public Works and Highways Region VI Director Nerie Bueno.
Sa interview sang Bombo Radyo kay Engineer Neil Ravena, head sang City Environment and Natural Resources Office, iya ginpahayag nga 3,600 nga mga native trees ang itanom nagikan sa Diversion Road padulong sa airport.
Suno kay Engineer Ravena, nagkalain-lain nga mga sahi sang native trees ang itanom lakip na ang Kasopangil, Malabago, Salinggogon, Labyanan, Bakan, Balitbitan, Bani, Catmon, Siar, kag madamo pa.
Nagpasalig si Engineer Ravena nga wala sang may maapektuhan nga infrastructure projects kaangay sang bike lanes sa nasambit nga greening program bangud nga gintun-an kun ano nga sahi sang kahoy ang itanom sa mga identified areas.
Ginahanda na sang syudad ang mga seedlings kag ang mga banwa na ang magatanum kag maga-maintain sang mga kahoy.
Subong nga semana, hingagawon ang pagbutang sang mga tree guards agud nga masuguran na sa labing madali nga panahon ang Iloilo Airport Gateway greening.
