ILOILO CITY – Ginhimuslan ang 14-anyos nga dalagita sa banwa sang Guimbal, Iloilo kasunod sang Bantayan Festival sa nasambit nga banwa.
Sa imbestigasyon sang Guimbal Municipal Police Station, nagkitaay sa Bantayan Festival ang biktima nga ginkilala lang kay Mae, kag ang mga suspek nga sanday Jonel, 19, kag Jep-Jep, 17.
Naghagaray ang tatlo nga mag-inom-inom sa kilid sang dagat kun sa diin ginapahayag nga ginlugos ang biktima.
Apang hugot nga ginpanginwala sang mga suspek ang nasambit nga akusasyon.
Ginpahayag sa Bombo Radyo ni Jonel nga wala siya sang ihibalo kun sin-o ang naghimulos kay Mae nga nakilala niya lang sa nasambit nga festival.
Ginkakibot naman ni Jep-Jep nga isa siya sa ginakabig nga suspek.
Ginpahayag sini sa Bombo Radyo nga ginbayaan nila ang biktima sa higad sang dagat matapos sila nag-inom-inom kag wala na mahibaluan ang sunod nga natabo.
Suno kay Jep-Jep, classmate sini sa elementary ang biktima apang madugay nga wala sila magkitaay kag liat lang nagkitaay kadungan sang festival.