Natugyan na sa Balay Dalayunan sa Bo. Obrero, Lapuz, Iloilo City ang isa ka menor de edad nga nagbuno sa kaangay niya nga menor de edad nga lalaki matapos ang isa ka kumprontasyon sa Jaro Plaza kagab-i.
Ang biktima sa amo nga insidente amo si alias Leo, 17-anyos, taga-Benedicto, Jaro, samtang ang nagbuno naman amo si alias William, 17, residente sang Barangay Bitoon sa amo man nga distrito.
Sa interview sang Bombo Radyo kay Police Corporal Hyacinth Buena, imbestigador sang Women and Children Protection Desk sang Iloilo City Police Station 9, iya ginpahayag nga lakip man sa gintugyan sa Balay Dalayunan amo si alias Chubby, residente sang Bitoon, Jaro, nga isa sa ginatudlo nga nagpuli-sumbag sa biktima.
Magluwas sa ila, gina-alegar nga nagbulig man tapungol ang kaupdanan ni William nga sanday alias Francis nga taga-Tabuc Suba, Jaro kag si alias Ian nga taga-Benedicto sa amo man nga distrito. Sila nga duha ang pareho nga ginapangita pa.
Suno kay Buena, nag-ugat ang insidente sang ginkumpronta ni Leo kagab-i ang grupo ni William kun sila gid man ang nagsumbag sa iya nga abyan.
May baisay nga natabo, tubtub nga ginbuno na ni William si Leo sa iya nga likod rason nga nasamaran ini apang subong estable naman ang kondisyon sa ospital.
Suno sa pulis, kilalahay man ang biktima kag ang grupo sang nagbuno.
Wala pa sang pinal nga desisyon halin sa ginikanan sang biktima kaangot sa legal nga tikang.
Ginapangabay naman sang kapulisan ang kooperasyon sang mga ginikanan sang involved nga mga kabataan. Kadungan sini, ginpanugyan man sang otoridad nga bantayan kag tudluan sang husto ang mga menor de edad agod malikawan ang kasubong nga insidente.#
