ILOILO CITY – Arestado ang isa ka menor-de-edad kag isa ka babaye nga nagabusong sa duha ka magkatuhay nga anti-drug operation sa banwa sang Sara, Iloilo.
Suno kay Police Chief Insp. Charlie Sustento, hepe sang Ajuy PNP kag team leader sang Philippine Drug Enforcement Unit Team 3 sang probinsiya, una nga nadakpan sa Salcedo Road, Sara, Iloilo ang 14-anyos nga si alyas Chen-chen sang Fisheries Road, Brgy. Poblacion, Concepcion, Iloilo matapos positibo nga nabaklan sang isa ka sachet sang suspected shabu kabaylo ang P500 nga buy-bust money.
Nakuhaan pa gid ini sang dugang nga isa ka sachet sang suspected shabu.
Sunod naman nga nadakpan ang nagabusong kag drug surenderee nga si Angelica Puada, 23-anyos, sang Sitio Buenavista, Brgy. Alibayog, Sara, Iloilo matapos mabaklan sang balor P500 pesos sang suspected shabu.
Nakuha sa paghinakop ni Puada ang duha pa gid ka bulto sang suspected shabu nga ginabanta nagabalor sang P15,000; improvised tooter, duha ka sachet nga may residue pa sang iligal nga droga, disposable lighter, mga aluminum foil kag mga dagom.
Nakapalagyo naman ang upod sini nga si Romar Dorde sang Sitio Busay, Brgy. Preciosa, Sara, Iloilo.
Nagapabilin sa kustodiya sang Sara PNP ang mga nagkaladakpan.