Nabun-an ang isa ka menor de edad sa Fort San Pedro, Iloilo City bangud sa ginapahayag nga wala pag-intindihanay sa tunga sang duha ka grupo ukon may daan na nga hiligut-anon.
Ang biktima ang ginkilala kay ”alyas Ian” naga-edad sang 17 anyos, residente sang Veterans Village, kag gina-alegar nga ginbuno sang suspek nga ginapahayag residente sang Barangay Cubay, Jaro.
Sa inisyal nga impormasyon, nagkitaay ang duha sa Fort San Pedro kag didto na nagluntad ang komprontasyon nga nagresulta sa pagpangbuno.
Nakaagom sang gamay nga pilas sa bahin sang abaga ang biktima kag gilayon naman nga gindapatan ini sang pagbulong.
Sa interview sang Bombo Radyo kay Jomarie Galagate, tanod commander sang Veteran’s Village, iya ginpahayag nga posible natripan lamang ang biktima.
Dugang pa niya nga ang biktima ang bag-o lang nakabalik sa lugar agud magbakasyon.
Ginpahayag man nga ang biktima ginakabig nga medyo salawayon kag may nauna na nga record nga may kaangtanan sa Violence Against Women and Children.
Sa pihak nga bahin, ang mga suspek nga ginapatihan residente sa Cubay, Jaro ang wala pa madakpan kag nakapalagyo matapos ang insidente.
Padayon ang imbestigasyon sang kapulisan agud makilala kag madakpan ang mga responsable sa amo nga insidente.
Gin-athag sang barangay official ang background sang menor de edad nga nabun-an sa nagluntad nga insidente sa Fort San Pedro, Iloilo City.
Sa interview sang Bombo Radyo kay Remedios Lopez, isa ka barangay kagawad, ginpahayag sini nga mabudlay sawayon ang biktima.
Suno sa iya, madungol ini kag may record sang pagpangawat, pagpanglingling kag paglapas sa curfew.
Dugang pa ni Lopez nga ginakabig nga may ara sang gang-gang nga grupo sang biktima, kag indi ini residente sang barangay kundi nagakadto lang ini permi didto bangud dira naga-estar ang iya lolo, mga tiya kag tiyo sini.
Bangod sini, ginpahayag sang barangay nga ipatawag subong nga adlaw ang mga involve nga indibidwal agud atubangon ang ila responsibilidad.
Ginahingadlan nga pagahatagan sila sang penalidad kag magapatigayon sang community service bilang kabahin sang pagdisiplina sa ila.
