Nagapapabilin nga yara sa kustodiya sang kapulisan ang menor-de-edad nga suspek sa pagbuno-patay sa barangay tanod sa Barangay San Juan, Molo, Iloilo City.
Ang biktima amo si Michael Barredo, 38-anyos, residente sang Zone 2 sa amo nga barangay.
Ang ginaalegar nga mga suspek amo sanday alias Carlo, 17-anyos, kag residente sang South Baluarte, Molo kag si alias Jet-jet sang Zone 1B, San Juan, Molo.
Sa interview sang Bombo Radyo kay Police Captain Ryan Christ Inot, Chief sang Iloilo City Police Station 4, iya ginpahayag nga santo sa kaupod sang biktima nga barangay tanod man, ginkumpirma sini nga si Alias Jet-jet gid ang nagpangamot sa pagpamuno.
Suno kay Inot, kinahanglan pa sang dugang nga kumpirmasyon halin mismo sa saksi nga tanod agud matumod kon si alias Carlo gidman ang menor-de-edad nga involve sa krimen.
Ginalantaw man kon ang natungdan ang naghatag sang kutsilyo kag nagbulig lampos sa biktima.
Ginpahayag man ni Inot nga ang pagpanghangkat sa ila bahin, amo ang may isa pa gid sang certain alias Carlo sang nagluntad ang insidente.
Ginahulat naman sang talatapan ang statement sang sang tanod nga nagresponde sa lugar agud makumpirma ang kahilabtanan sang menor-de-edad nga si alias Carlo sa insidente.
Ginlaragway sang punong barangay sang San Juan, Molo, Iloilo City nga aktibo klase tanod sa ila lugar si Michael Barredo, ang ginbuno-patay sang menor-de-edad kahapon nga adlaw.
Ini kasunod man sang iya pagresponde sa kinagamo sang mga pamatan-on sa nasambit man nga lugar.
Suno kay Punong Barangay Jose Martin Maloto, iya ginpahayag nga si Barredo ang nagaserbi nga taga-luto sa ila nga tanod outpost.
Dugang sang opisyal nga masami gidman nga nagapangsaway ang biktima sa mga kabataan nga pasaway sa ila komunidad.
Gin-athag man sini nga duha lamang sila nga tanod ang nagpadulong sa lugar agud sawayon ang mga kabataan.
Minutos lamang ang nagligad, didto na kag may nag-report sa iya nga nabun-an na si Barredo.
