ILOILO CITY – Nagnubo ang numero sang mga nadakpan nga menor de edad nga nagalapas sa curfew for minors sa Syudad sang Iloilo.
Sa interview sang Bombo Radyo kay Nestor Canong, pinuno sang Task Force on Moral and Values Formation, iya ginpahayag nga as of March 23, anom lang ang narekord nila nga menor de edad nga naglapas sa curfew kag ini ang ginalakipan sang duha ka lalaki kag apat ka babaye.
Suno kay Canong, duha ka babaye nga menor de edad ang ila nadakpan sa Iloilo City Proper, duha man ka babaye sa Arevalo kag duha ka lalaki nga ginaalegar nagasimhot sang rugby sa Lapuz, Iloilo City.
Samtang wala naman sang nadakpan nga naglapas sa curfew sa distrito sang Mandurriao, Jaro, Lapaz, kag Molo.
Ginkalipay man ni Canong ang padayon nga pagkooperar sang mga barangay officials sa paglibot kag pagpahanumdom sa mga pumuluyo sang curfew sa kabataan bangud man sa kahangawa nga pagsaka ang COVID-19 cases sa syudad.
Matandaan nga Marso 16 sang liwat nga nagpagwa sang statement si Iloilo City Mayor Jerry Treñas nga mas hugtan pa ang pagpatuman sang curfew on minors.
Ang mga menor de edad nga madakpan nga nagalapas sa curfew ang dal-on sa City Social Welfare and Development Office (CSWD) agud didto na kwaon sang ila mga ginakanan.
