𝗜𝗟𝗢𝗜𝗟𝗢 𝗖𝗜𝗧𝗬 — Patay ang isa ka menor-de-edad matapos nga nalumos sa Fort San Pedro, Iloilo City subong nga adlaw, Hunyo 22, 2024.
Ang biktima ang 16-anyos, Grade 12 student, kag residente sang Dueñas, Iloilo.
Sa interview sang Bombo Radyo kay Alyas Nene, pakaisa sang biktima, iya ginpahayag nga apat sila nga mag-abyan ang naglangoy kaupod ang biktima kagina sang aga kag gulpi na lang nga wala nila natalupangdan ang iya pakaisa.
Suno kay Alyas Nene, naglangoy padulong sa madalom nga parte sang baybay ang biktima, rason nga ginpangita nila ini, apang wala nila nakit-an tubtob nga sila ang nagpauli sa ila puluy-an bangud abi nila, nagpauli man ang biktima.
Ginpahayag man sini nga sang nag-abot na sila sa ila puluy-an, ginpamangkot sini ang iya nga tiya kun nakapauli na ang iya pakaisa, apang suno sa iya tiya, wala nakapauli ang biktima.
Didto na kag nagkinaran-karan ang ila himata agud balikan ang biktima sa baybay kag pangitaon.
Apang, masubo nga nadangtan na lamang sang mga himata, ang lawas sang menor-de-edad nga wala na sang kabuhi kag may pilas sa ulo.
Nahibaluan nga ang biktima ang nagpadulong sa syudad agud kuntani nga magbakasyon kag magsugat sa iya nga pakaisa kag magpauli sa banwa sang Dueñas.
Ginalantaw naman sang otoridad ang posibilidad nga nakabunggo ang biktima sa bato sa idalum sang tubig nga posible nangin rason man sang pagkalumos sini.
