Maayo nga tion ang panugod sang 2021 agud matumod ang mga prayoridad sang isa ka tawo nga makabulig sa mental health.
Sa interview sang Bombo Radyo kay University of the Philippines Visayas Psychology Professor Monique Muyargas, iya ginpahayag nga lain-lain man ang kinahanglanon sang tagsa ka tawo kag dapat lang nga i-evaluate kun ano ang nagakabagay nga himuon.
“2021 is a good start to realign sang aton nga priorities sa kabuhi: whether it’s work, whether it’s family, whether it’s relationship, whether it’s financial stability, whether it’s mental health — whatever that works for you. When it’s important for you to disengage sa social media kag indi ka ya gusto maglantaw sang bad nga news, you can disengage. Those are the simple things that you can do for yourself on a personal level,“ pahayag ni Muyargas.
Maayo man suno sa iya nga ma-reevaluate ang relasyon sa iban nga mga tawo kaangay sang pamilya, mga abyan, kag pati sa iban nga tawo yara sa luwas sang pungsod.
Subong nga tion suno sa iya labi nga importante ang komunikasyon bangud kinahanglan sang tagsa ka tawo sang emotional support.
Dapat man i-maximize ang teknolihiya kag ang nanuhay-tuhay nga social media platforms agud mabuligan ang iban.
Gin-engganyo man sang natungdan ang publiko nga padayunon ang kaalwan — kaangay sang ginpakita sang ginpatuman ang lockdown kun sa diin nangin natural reaction na sang tawo ang pagtanyag sang bulig sa mga nagakinahanglan.
Dapat man nga kabigon nga normal ang pagkadto sa psychiatrist agud ma-address sang husto ang mental health concerns. Suno kay Muyargas, kun may yara sang ginatawag nga physical health check-up, may yara man sang mental health check up.
Importante man suno sa iya nga mahangpan sang publiko nga indi madala sa pag-inom sang bulong ang ginabatyag sang isa ka tawo nga may mental health illness.
Buot silingon sini, collective process ang kinahanglan ukon pagbinuligay sang pamilya, abyan, kag iban pa nga support group.
Nagpaandam ang natungdan nga sillent killer ang mental health illnesses kaangay sang depression gani indi dapat nga paghipus-hipusan lang kag hatagan sang sala nga interpretasyon.
