ILOILO CITY – Makabig nga sensitibo ang paghatag sang solusyon sa mental health problem.
Ini ang ginpahayag sang isa ka Registered Guidance Counselor may kaangtanan sa numero sang mga nagapangayo sang bulig sa Western Visayas Psychosocial Support for COVID-19.
Sa Good Morning Philippines Program, ginpahayag ni Francis Ray Subong, volunteer sa nasambit nga grupo, nga tama ka lapad ang sakop sang ginatawag nga Psychosocial Service.
Suno kay Subong, ang tagsa ka tawo ang may yara sang nanari-sari nga personalidad rason nga nagkalain-lain man nga Pyschosocial Service ang kinahanglan gikan sa mental health professionals kasubong sang Psychologist kag Counselor.
Ginpahayag ni Subong nga ang ginapangatubang nga pandemya ang nakatuga sang mental health problem rason nga natukod ang Western Visayas Psychosocial Support for COVID-19, isa ka grupo nga nagahatag sang online mental health services.
Sang sang Abril suno kay Subong, nagtaas ang numero sang mga nagapangayo sang bulig bangud sa stress nga tuga sang kahangawa nga malatnan sang Coronavirus Disease 2019 (COVID-19) kag ilabi pa nga madamo ang nadismaya bangud nga ginpalawig ang lockdown.
Subong nga yara na sa Modified General Community Quarantine ang kalabanan nga mga lugar sa rehiyon, ginpahayag sang natungdan nga nagnubo ang numero sang mga nagapangayo sang mental health services.
Ang nasambit nga grupo ang mahimo nga malab-ot paagi sa Facebook Page nga Western Visayas Psychosocial Support for COVID-19.
