ILOILO CITY- Pasangkaron pa sang Iloilo Schools Division Office sang Department of Education (DEPED) ang mga mental health programs para matapna ang posible ‘suicide incidents’ sa mga eskwelahan kaangay sang natabo sang Agosto 19 sa isa ka buluthuan sa San Miguel, Iloilo.
Sa interview sang Bombo Radyo kay Mr. Leonil Salvilla, spokesperson sang Iloilo Schools Division Office, iya ginpahayag nga ini ang pinakauna nga bes humalin sang COVID-19 pandemic nga may natabu nga kaangay nga insidente.
Suno sa natungdan, isa ini ka oportunidad sa ila talatapan nga hatagan sang igtalupangod kag pasangkarun ang mga mental health programs sa mga eskwelahan.
Dugang pa sini nga indi lang ang mga estudyante ang dapat malakip sa mga mental health programs kundi mangin ang mga manunudlo bangud tanan ang may ginapangatubang man nga pagpanghangkat sa kabuhi.
Nakagwa naman sa ospital ang estudyante matapos ginbulong kag may mga nagpalab-ot man sang bulig sa pamilya sini.
