Natalana nga bitayon sa Singapore sa masunod nga semana ang isa ka lalaki nga may problema sa paminsaron matapos nga wala ginpamatian sang korte ang iya final appeal.
Ini amo ang Malaysian nga si Nagaenthran K. Dharmalingam, 34, nga naaresto sang 2009 bangud nadakpan sa tuyo sini nga pagpasulod sang 43 grams (1.5 ounces) sang heroin sa Singapore.
Nobyembre pa sang nagligad nga tuig naka-schedule ang pagbitay kay Dharmalingam, kag madamo ang nagpakamalaot sa sini nga akto bangud mentally disabled ang lalaki.
May yara ini sang IQ nga 69 – ang level nga ginakilala nga intellectual disability.
Matapos ang pila ka tuig nga pagpakibato sa amo nga kaso, napierde si Dharmalingam sa kaso bangud ginbasura sang huwes ang argumento nga ang pagpatay sa isa ka tawo nga may problema sa paminsaron ang naga-contravene sa international law.
Ginkumpirma man sang pamilya sini nga patigayunon ang execution sa Miyerkules sa masunod nga semana. Magabyahe ang iya iloy kag tatlo ka utod sa Singapore agud nga makit-an siya antes ang schedule sang pagbitay. ##
