ILOILO CITY – Tuman ang kalipay sang Queen Rabiya team bangud sa mainit nga pagbaton sang mga Ilonggo sa homecoming ni Miss Universe Philippines 2020 Rabiya Mateo.
Sa exclusive interview sang Bombo Radyo kay Mr. Joe Marie Agriam, publisher sang Cream dela Creme Magazine kag mentor ni Rabiya, iya ginpahayag nga proud kag fulfilled siya sa nalab-ot nga kadalag-an sang Ilongga beauty queen.
Suno kay Agriam, dako ang pagsalig niya kay Rabiya humalin sang nagpasakop ini sa Miss Iloilo 2020 sa diin handom niya nga magdala sang kalipay sa mga Ilonggo.
“Happy gid siya [Rabiya Mateo] kag mga supporters niya. Ginatawag nakon ini nga Queen Rabiya team. Ini ang team nga gapulaw-bugtaw agud masigurado nga leading siya pirme sa online voting,” pahayag ni Agriam.
Ginpakigbahin man sang natungdan nga kaangay sadto sang Ilongga nga si Angelia Ong, nagbuya ini sang tinaga nga indi siya magpauli sa Pilipinas kun indi niya makuha ang Miss Earth 2015 crown kag ini ang iya natuman.
Si Rabiya suno kay Agriam ang naghambal man sa iya nga indi siya magpauli sa Iloilo kun indi iniya madala pauli ang titulo bilang Miss Universe Philippines 2020.
“Tito Joeboy, I will not go back to Iloilo nga wala ang korona. Ti ina nabatian ko na ina kay Angelia Ong nga Miss Earth 2015 nga siling ya sa akon paglakat niya sa Vienna, Austria. Siling niya, Tito I will not go back to the Philippines without bringing the crown,” dugang pa ni Agriam.
Nalipay man ang nasambit nga mentor bangud nakita niya ang 5’7 Ilongga beauty nga may yara na sang self confidence kag determinado sa iya handom ilabi na sa pagpasakop sa Miss Universe.
