Ginalantaw sang grupo sang mga negosyo nga ginapamunuan sang entrepreneurship advocacy group nga Go Negosyo ang mas malipayon nga paskwa para sa mga Filipinos bangud positibo ang mga ini nga malab-ot ang herd immunity sa Setyembre ukon Oktubre.
Suno kay Joey Concepcion, presidential adviser for entrepreneurship, mahimo nga magbuligay ang pribado nga sektor kag ang gobyerno agud nga mangin relax ang restrictions antes pa man malab-ot sang pungsod ang herd immunity.
Pahayag niya, kun magtutok lang ang pribado nga sektor sa pagsiguro nga 80% sang mga empleyado sa kada office building ukon establisimento ang mabakunahan, dako ang posibilidad nga makabalik na ang mga negosyo sa 100 percent operating capacity.
Nahibaluan nga yara pa lang sa 3 million nga mga Filipinos ang fully vaccinated batuk sa COVID-19 as of July 7.
Target sang gobyerno nga makabakuna sang 58 tubtob 70 million gikan sa 109 million nga mga tawo sa Pilipinas agud nga mabuksan na liwat ang ekonomiya.
