ILOILO CITY – Nakigsapol subong nga adlaw si Iloilo City Mayor Jerry Treñas sa Metro Pacific Iloilo Water, Flo Water Resources Iloilo Incorporated kag South Balibago Waterworks sa update sang water supply sa syudad.
Ini kasunod sang reklamo sang mga konsumidor sa kakulang sang water supply kun sa diin wala malab-ot sang Metro Pacific Iloilo Water ang minimum requirement nga 80 million liters kada adlaw, kag yara na lamang ini sa 71 million liters.
Sa interview sang Bombo Radyo kay Mayor Treñas, iya ginpahayag nga madugay na nga nagatanyag ang Flo Water Resources Iloilo Incorporated sang dugang nga 10 million liters sang tubig kada adlaw, apang bangud sa magagmay nga tubo sang Metro Pacific Iloilo Water, indi ini makasarang nga magsupply sang tubig.
Nahibaluan nga madugay na nga naga-supply sang 20 million liters sa kada adlaw ang Flo Water Resources Iloilo, Incorporated.
Samtang, nagpasalig naman ang South Balibago Waterworks nga mahimo nga mabalik sa sulod sang pila ka adlaw ang water supply matapos nagkaproblema ang water pump.
Sa subong, gina-finalize pa sang Metro Pacific Iloilo Water ang mga wala nagamit nga deep wells, kun sa diin matapos ang anum ka bulan, makadugang na ini sang 5 million liters per day.
Natalana naman nga makigsapol liwat ang alkalde sa Metro Pacific Iloilo Water kag bulk suppliers agud i-finalize ang nagakaigo nga tikang agud masolusyunan ang water supply sa syudad.
