ILOILO CITY – Ginakabig sang Metro Pacific Iloilo Water (MPIW) nga dako nga bulig ang pagbubo sang ulan sa supply sang tubig sa syudad sang Iloilo.
Sa interview sang Bombo Radyo kay Mr. John Canoñero, Commercial Head sang n Metro Pacific Iloilo Water, iya ginpahayag nga wala na-antisipar sang kompanya nga tuman ka dako ang mangin epekto sang El Niño Phenomenon sa Iloilo City.
Suno kay Canoñero, bangud sa pagtupa sang ulan, nagaguwa sa ila data nga naga-amat-amat na taas ang lebel sang tubig sa ila ginakuhaan nga suba.
Nagapangabay naman ang natungdan nga kuntani tayuyon na ang pagtaas sang tubig agud indi na magkulang ang supply sa syudad kag mahagan-hagan na ang water shortage.
Santo sa datus subong nga bulan sang Mayo, naglab-ot sa 76.2 million per day ang total sang bulk water nga mapaguwa sang Metro Pacific Iloilo Water.
Nagpasalig man ang water supplier nga nakahanda gihapon sila nga magserbisyo sa Iloilo City Government kag sa mga residente.
Nahibaluan nga nagpatigayon kahapong nga adlaw sang labing-una nga public hearing ang Metro Pacific Iloilo Water kag Metro Iloilo Water District kaangot sa pagpataas sang minimum nga balayran sang tubig sa syudad.
