ILOILO CITY – Dalayawon ang pagpanikasog sang mga ahensya sang gobyerno sang Pilipinas sa mga tikang nga ginahimo sa pagtapna sang 2019 Novel Coronavirus Acute Respiratory Disease nga naghalin sa Wuhan, China.
Sa interview sang Bombo Radyo kay anay Department of Foreign Affairs Secretary Perfecto Yasay Jr., iya ginpahayag nga pinaagi sa collective efforts sang tanan nga mga ahensya, padayon nga natigayon nga mahatagan sang nagakaigo nga igtalupangod ang tanan nga mga tawo sa pungsod ilabi na ang mga Persons Under Investigation, Persons Under Monitoring kag duha ka mga positibo sa novel coronavirus.
Sa bahin sang Department of Foreign Affairs, nangin maayo man ang ila nangin lihok sa pagtatap sa mga Overseas Filipino Workers ilabi na ang mga yara sa pungsod nga may kaso sang novel coronavirus.
Suno kay Yasay, ang kinahanglan lamang nga padayunon sang mga opisyales sang gobyerno amo ang maid-id pa nga pag-research sa nasambit nga virus.
Samtang dako man ang epekto sa ekonomiya sang pungsod ang pag-ban sa mga foreign nationals nga naghalin sa China kag sa mga rehiyon sini kaangay sang Macau kag Hong Kong nga makasulod sa Pilipinas .
Nagpangabay man si Yasay sa publiko nga untaton na ang mga pagpakamalaot sa mga opisyales sang gobyerno sa baylo magbinuliganay na lamang sa tunga sang pagpanikasog sang tanan nga pakigbato-an ang novel coronavirus agud nga indi na maglapta pa sa iban nga mga lugar sa pungsod.
