ILOILO – May pila ka palamangkutanon ang mga alkalde sa probinsya sang Iloilo may kaangtanan sa pag-umpisa sang pagpatuman sang border restrictions sa Panay.
Ini ang kasunod sang ginpatigayon nga pagsinapol sang mga alkalde kaupod si Iloilo Gov. Arthur Defensor Jr. may kaangtanan sa lihok sang provincial government may kaangtanan sa Coronavirus Disease 2019 (COVID-19).
Sa pagsinapol, lakip sa mga nagpalab-ot sang pamangkot kay Gov. Defensor amo sanday Carles Mayor Seigfredo Betita, San Dioniso Mayor Larry Villanueva kag Balasan Mayor Manuel Ganzon.
Ginpalab-ot ni Mayor Betita ang tuhoy sa report nga may mga pasahero nga halin sa iban nga lugar nga naga-agi sa isla nga sakop sang Carles agud nga indi maka-agi sa checkpoint.
Ginpahayag naman ni Mayor Villanueva nga siya mismo ang naka-eksperyensya kun daw ano ka istrikto ang ginapatuman nga border restrictions sa ila banwa padulong sa Capiz.
Sa pagpaathag ni Mayor Villanueva, na hospital ang iya iloy sa Capiz kag nagalain man ang pamatyag sang iya amay nga kinahanglan kun tani nga dal-on sa hospital apang bangud sa border restrictions, indi sila makadali-dali sa pagpadulong sa kaiping nga probinsya.
Suno naman kay Balasan Mayor Manuel Ganzon, gina-hold ang delivery sang goods halin sa banwa padulong sa Capiz kun sa diin ang santo sa Executive Order sang gobernador, wala nalakip sa community quarantine ang delivery sang balaklon.
Sa pagpaathag naman ni Gov. Defensor, exempted ang nagakinahanglan sang human consideration kasubong na lang sang mga pasyente nga dapat dal-on sa hospital apang dapat ini nga ipahangop sa mga nagapatuman sang border restrictions.
Magluwas diri, ginpahayag man sang gobernador nga dapat ipahibalo kay Capiz Gov. Esteban Evan Contreras ang tuhoy sa nasambit nga concerns agud nga mapangitaan sang paagi.
Ginduso man ni Concepcion Mayor Raul Banias nga himuon nga quarantine facility ang mga eskwelahan.
