ILOILO – Madamo sang concerns nga ginpalab-ot ang mga alkalde sa probinsya sang Iloilo kadungan sang emergency meeting subong nga adlaw, Hulyo 19, nga ginpatigayon sa Janiuay, Iloilo.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga kabahin sa mga problema sang tagsa ka Local Government Unit amo ang pag-abot sang mga Locally Stranded Individuals.
Suno kay Mamon, ginaproblemahan man sang iban nga Local Government Unit ang nagaginutok nga facility quarantine bangud sa atrasado nga pagpaguwa sang resulta sang Reverse Transcription Polymerase Chain Reaction (RT-PCR) test.
Ginpahayag ni Mamon nga agud nga masolusyunan ang nasambit nga problema, nagpahanugot na ang Department of Education nga gamiton ang iban nga eskwelahan bilang temporaryo nga facility quarantine.
Magluwas diri, ginapangitaan man sang paagi agud nga mas mapadasig ang pagpaguwa sang RT-CPR test results sa mga laboratoryo sa Western Visayas nga nagaproseso sang specimen.
Sa duha ka trip sang mga nagpauli nga Locally Stranded Individuals sang damlag lang, ginpahayag sang natungdan nga isa sa mga nakita nga problema amo ang atrasado nga pagpahibalo sa Iloilo Provincial Government rason nga atrasado man ang pagpahibalo sa tagsa ka Local Government Unit.
