ILOILO CITY – Mahimo na nga mag-file sang kaso ang isa ka amay in behalf sang iya menor de edad nga anak batuk sa iloy nga naga-abuso sang mga kabataan pinaagi sa Anti-Violence against Women and their Children Act.
Sa interview sang Bombo Radyo kay Atty. Alfredo Arungayan III, Bombo Abogado kag Criminal Law professor sa University of San Agustin- College of Law, iya ginpahayag nga ini ang santu sa landmark ruling sang Supreme Court.
Sa 18 ka pahina nga desisyon ni Justice Mario Lopez, ginpahayag sini nga indi buot silingon nga sa Anti-Violence against Women and their Children Act, wala nalakip ang lalaki bilang biktima, indi na ini mahimo nga magpasaka sang kaso bangud lamang nga lalaki ini kag indi isa ka “woman victim of violence.”
Suno pa sa desisyon, ang isa ka iloy nga nagmaltrato sa iya anak nga nagresulta sa physical, sexual ukon psychological violence nga mahimo nga magpanabat sa idalom sang “Anti-Violence Against Women and Their Children Act of 2004” ang indi abswelto sa criminal liability ilabi pa nga ang layi ang may katuyu-an nga mahatagan sang proteksyon ang mga babayi kag ang ila mga kabataan.
Bangud sini suno kay Atty. Arungayan, wala nakita sang korte nga may kinalain ang iloy kag amay nga nag-abuso sa ila kabataan.
