ILOILO CITY- Nagahibubun-ot ang isa ka anay preso nga nagsurrender kag liwat napreso abangud sa kontrobersiyal nga Good Conduct Time Allowance.
Sa interview sang Bombo Radyo kay Vicente Padrones sang Guimaras nga yara subong sa Sablayan Prison and Penal Farm sa Occidental Mindoro, iya ginpahayag nga manug-isa isa ka bulan na humalin sang siya ang nagsurrender apang wala gihapon sang kaathagan kun san-o sila makagwa.
Suno kay Padrones, sa pagkamatuod, indi siya isa sa mga benepisyaryo sang Good Conduct Time Allowance bangud nga natapos gid niya ang iya 14 ka tuig nga sentensiya apang napilitan siya nga magsungka bangud nga yara ang iya pangalan sa watchlist sang Philippine National Police.
Ginpahayag ni Padrones nga naluoy siya sa iya pamilya nga nabilin sa Guimaras bangud nga siya man lang kuntani ang ginasaligan para sa ila adlaw-adlaw nga kinahanglanon sa sulod sang balay paagi sa iya pagpanguling.
Sa subong suno kay Padrones, makaluluoy man ang ila sitwasyon sa Sablayan Prison and Penal Farm bangud nga pan-os ang ginapakaon sa ila.
Magluwas diri, apisar ginseparar sila sa mga preso apang ang ila ginatulugan sa Sablayan Prison and Penal Farm ang balay-balay nga may trapal.
Nagahingyo naman ini sa gobyerno nga kuntani talupangdon ang ila mga kaso kag mahilway na liwat sa pinakamadali nga panahon.
Nahibaluan nga may yara sang 150 ka mga anay preso sa Western Visayas ang nagbalik sa Sablayan Prison and Penal Farm matapos nagsurrender bangud sa kontrobersyal nga Good Conduct Time Allowance sa diin ang iban sa ila ang mga Good Conduct Time Allowance beneficiaries kag ang iban ang parolado.
