Kun may panawagan si Senador Ronald ‘Bato’ dela Rosa sa mga anay miyembro sang Armed Forces of the Philippines (AFP) kag Philippine National Police (PNP) nga mag-boluntaryo sa paghatag sang proteksyon kay Vice President Sara Duterte, indi man magpaulihi si Senador Robin Padilla.
Apang indi ang mga former personnel sang PNP kag AFP ang ginapanawagan ni Padilla kundi ang mga anay myembro sang rebelde nga grupo nga nakabalik na sa sabak sang gobyerno.
“I salute to you sir Senator Ronald “bato” Dela Rosa,” kabahin sang Facebook post ni Padilla sang gin-share sini ang panawagan ni Dela Rosa. Dugang sini, “Ako man nananawagan naman po ako sa lahat ng mga dating rebelde na mayroon ng mga tamang papeles ng pagsuko at amnestiya.”
“Kayong may kaalaman sa penjak silat/kali/eskrima at handang suma ilalim sa pagsasanay, pagsusuri, clearances at approval ng opisina ng Pangalawang Pangulo. Isang karangalan para sa mga nag balik loob na makapagsilbi ng boluntaryo sa naging Tagapagmana ng NTF-ELCAC at Pangalawang Pangulo Inday Sara Duterte.”
Sa statement ni Dela Rosa nga anay PNP chief, nagsiling sini nga “bayanihan lang” ang matabo sa mga gusto magdugang sa security detail sang bise-presidente.
“Attention former PNP/AFP pers who are good at unarmed combat & volunteering to provide security & protection to VP Inday Sara pls sound off! Bayanihan lang walang sweldo,” pahayag sini.
Matandaan nga kahapon sang aga sang nagpaguwa sang open letter si Sara para kay PNP Chief Police General Rommel Francisco Marbil kun sa diin ginpatpat sini ang mga bagay nga iya ginkadismaya lakip ang sulit-sulit nga pagpa-interview ni Marbil nga naga-mensyonar sa iya pangalan.
Ginsiling sang bise-presidente nga makatrabaho man siya nga wala sang security apang gindugang sini nga isa ka “political harassment” ang ginhimo ni Marbil nga pagkakas sang 75 ka mga pulis halin sa iya security detail.
“Wala akong problema sa pagbawi sa mga PNP personnel bilang security team ng Office of the Vice President (OVP). Kaya kong magtrabaho ng walang security. Ngunit may problema ako sa mga kasinungalingang ipinapahayag sa taumbayan — lalo na kung ang mga kasinungalingang ito ay mula mismo sa pinakamataas na opisyal ng kapulisan,” kabahin sang open letter.
Ginahulat pa ang mangin sabat sang PNP sa malawig nga pahayag sang bise-presidente apang antes sini, nag-isyu na si Marbil sang direktiba nga i-rationalize ang deployment sang Police Security and Protection Group personnel para malab-ot ang police-to-population ratio nga 1:500.
Sa pihak nga bahin, nagpahayag man ang isa ka Duterte ally nga si Senator Bong Go nga ginkakasan man siya sang security detail antes ini natabo sa anak sang former president.
Suno sa senador nga suod nga long-time aide ni former president Rodrigo Duterte, natabo ini sa iya ginabanta tatlo ka semana na ang nagligad.
Ginpahayag sini nga nagakahangawa man siya bangud trabaho man niya bilang senador nga makalab-ot sa bisan diin nga parte sang Pilipinas kag may mga pamahog man sa ila nga kabuhi.
Wala pa sang ginpaguwa nga detalye si Go kaangot sa iya alegasyon, apang nagpahanumdom ini sa liderato kag sa hanay sang PNP nga magpabilin sa ila nga ginsumpaan nga responsibilidad kag indi magpagamit sa anuman nga politikal nga agenda.
Pahayag pa sini, dapat nga mangin propesyunal ang pulis kag himuon lamang kun ano ang husto.#
