ILOILO CITY – Maga-abot subong nga adlaw ang tanan nga mga atleta nga magapakigbahin sa 24th University Games nga hiwaton sa syudad sang Iloilo.
Sa interview sang Bombo Radyo kay Rev. Father Wilson Capellan, OSA, Chairman sang Media and Publicity Committee, iya ginpahayag nga kalabanan sa mga atleta ang magapadulong gilayon sa University of San Agustin agud nga makahanda.
Suno kay Capellan, preparado naman ang 71 ka mga hulot sa University of San Agustin agud nga pahuwayan sang ginabanta masobra sa 2,000 ka mga atleta samtang ang iban naman ang magatinir sa hotel.
Ginpahayag ni Capellan nga nakahanda naman ang mga kinahanglanon sa University Games kasubong sang bulong kag transportasyon kag nakaplastar naman ang security plan.
Nagpanugyan man si Capellan sa mga maluyag maglantaw nga magpadulong sa venue sang mas temprano.
Maka-akomodar sang 7,000 ka mga tawo ang University of San Agustin Gym kag isa ka maayo nga paagi ang University Games bilang family bondingsubong nga semestral break.
Samtang, yara na sa full implementation ang tanan nga komitiba sang University Games sa University of San Agustin.
Suno kay Fray Stephen Tan, Over-all Chairman sang Steering Committee, iya ginpahayag nga ‘on stand-by’ na ang tanan nga mga opisyal kag nakaplastar naman ang ila plano.
Nagapasalamat man si Tan sa Bombo Radyo Iloilo lakip man sa Iloilo Sports Youth Development Council kag Iloilo City Government sa padayon kag hugot nga suporta sa University Games.
Pagahiwaton, 3:00 buwas sa hapon ang opening mass kag pagasundan sang opening celebration kag panihapon kaupod ang mga opisyal sa syudad sang Iloilo.
Nahibaluan nga sa Lunes, Oktubre 21 magaumpisa ang mga hampang nga Athletics, Basketball, Football, Volleyball, kag Beach Volleyball kag magatapos sa Dominggo, Oktubre 27.
