ILOILO CITY- Wala sa gihapon nakabaton sang allowance ang mga atleta halin sa Iloilo City nga magapasakop sa Palarong Pambansa 2023.
Sa interview sang Bombo Radyo kay Freddie Gallardo, Sports Coordinator sang Department of Education- Schools Division of Iloilo City, iya ginpahayag nga ang rason kun ngaa na-delay ang paghatag sang allowance amo ang discrepancies sa mga dokumento nga ginaproseso sang Liaison Officer sang Schools Division of Iloilo City.
Suno kay Gallardo, may yara sang mga dokumento nga kulang pag-abot sa Accounting Office sa Iloilo City Hall gani indi naman maproseso kag pila ka beses na nga nagabalik- balik bangud sa mga sala-sala nga mga papeles.
Pahayag ni Gallardo,sa pagkamatuod, ang payroll nga ginaproseso subong ang para pa lang sa District Meet kag wala pa ang para sa Western Visayas Regional Athletic Association Meet.
Nagasalig naman ang natungdan nga mapadasig ang paghitso sang mga dokumento agud nga mahatag gilayon ang allowance sang mga atleta antes sila makabiya padulong sa Manila para sa Palarong Pambansa.
