ILOILO CITY- Ginkadismaya sang mga atleta nga nagapasakop sa pinakauna nga Philippine ROTC Games Visayas Regional Qualifying Leg nga ginpabayad sila sa Iloilo Sports Complex agud maggamit kuntani sang oval para sa training antes ang ila event.
Sa interview sang Bombo Radyo kay alyas Marvie nga isa sa magapasakop sa athletics, iya ginpahayag nga ginkakibot nila sang iya kaupdanan nga ginsukot sila sang tag- P20 kada isa gikan sa orihinal nga P30 matapos ginhatagan sila sang discount.
Suno kay Marvie, mangin ang ila coach ang ginpabayad man sang P30.
Pahayag niya, indi nila mahangpan kun ngaa kinahanglan nila nga magbayad apisar nga sa sports complex man ang venue sang ila event.
Nahibaluan nga ang Philippine ROTC Games Visayas Regional Qualifying Leg ang nagsugod sang Agusto 13 kag magatakop sa Agusto 19.
