Ipaanggid sa iban nga mga pungsod sa bilog nga kalibutan, pinasahi ang Valentine’s day sa South Korea bangud indi lalaki ang nagahatag sang mga regalo kag tsokolate kundi babaye.
Suno kay Bombo International Correspondent Connie Tumines, direkta sa South Korea, isa lang ang Valentine’s day sa 12 “love days” nga ginaselebrar kada ika-14 nga adlaw, kada bulan sa Korea.
Ini amo ang Diary Day kada Enero, Valentine’s Day sa Pebrero, Rose Day sa Mayo, Kiss Day sa Hunyo, Silver Day sa Hulyo, Green Day sa Agusto, Photo Day sa Septyembre, Wine Day sa Oktubre, Movie Day sa Nobyembre, kag Hug Day sa Disyembre.
Sa nakaandan, ang mga lalaki nga nakabaton sang regalo kag tsokolate sang Valentine’s Day, nagabalos sa paghatag sang regalo sa mga kababainhan sa masunod nga bulan sa White Day.
Apang kun may ‘couple day’ ukon adlaw sang mga magkahugma kada Valentine’s day sa Korea, may yara man sang adlaw sang mga single nga ginatawag nga ‘Black Day’ sa ika-14 sa bulan sang Abril kun sa diin nagatililipon ang mga mag-abyan nga wala sang nobyo kag nobya agud ululupod magkaon sang ‘Jjajyangmyeon’ ukon Black Noodles.
